ଭୁବନେଶ୍ୱର (ସରସ୍ୱତୀ ଖବର):
ଭୁବନେଶ୍ୱର ମହାନଗର ନିଗମ ଅଧୀନସ୍ଥ ନୟାପଲ୍ଲୀ ନୂଆସାହିଠାରେ ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ଶ୍ରୀ ଶ୍ରୀ ଆଖଣ୍ଡଳମଣି ସେବା ସଂସଦ ପକ୍ଷରୁ ‘ନୂଆସାହି ଶ୍ରୀ ଗଣେଶ ମହୋତ୍ସବ-୨୦୨୬’ ମହାଆଡ଼ମ୍ବରରେ ଆୟୋଜିତ ହେବାକୁ ଯାଉଛି। ଏନେଇ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସଂସଦ ପକ୍ଷରୁ ପୂଜା ପ୍ରସ୍ତୁତି ଓ ଆକର୍ଷଣ ସମ୍ପର୍କରେ ବିସ୍ତୃତ ସୂଚନା ପ୍ରଦାନ କରାଯାଇଛି।
ଶାନ୍ତି ଓ ଭାଇଚାରାର ବାର୍ତ୍ତା ବାହକ ‘ନୂଆସାହି ରାଜକୁମାର’
ଚଳିତ ବର୍ଷର ମୁଖ୍ୟ ଆକର୍ଷଣ ପାଲଟିଛି ବିଶାଳ ରୁଷିଆ ଗେଟ୍ ତୋରଣ, ଯାହା ମାଧ୍ୟମରେ ସମଗ୍ର ସମାଜକୁ ଶାନ୍ତି, ଦେଶପ୍ରେମ ଏବଂ ଭାଇଚାରାର ଅନନ୍ୟ ବାର୍ତ୍ତା ଦିଆଯିବ। ଏହି ଭବ୍ୟ ତୋରଣ ସମ୍ମୁଖରେ ବିରାଜମାନ ହେବେ ଶ୍ରଦ୍ଧାଳୁଙ୍କ ପ୍ରିୟ ‘ନୂଆସାହି ରାଜକୁମାର’ ବା ବିଶାଳକାୟ ଶ୍ରୀ ଗଜାନନ।
ରାଜ୍ୟର ସର୍ବୋଚ୍ଚ ପ୍ରତିମା ଓ ପରିବେଶ ଅନୁକୂଳ ନିର୍ମାଣ
ଉକ୍ତ ମୂର୍ତ୍ତି ଓଡ଼ିଶାର ସର୍ବୋଚ୍ଚ ଶ୍ରୀ ଗଣେଶ ପ୍ରତିମା ଭାବେ ଗଢ଼ି ତୋଳାଯାଇଛି। ଓଲଟ ଚାନ୍ଦନ୍ଦର ପ୍ରସିଦ୍ଧ ଶିଳ୍ପୀ ଅକ୍ଷୟ ମହାପାତ୍ର ଏବଂ ତାଙ୍କ ୧୫ ଜଣିଆ ସହଯୋଗୀ ଦଳ ବିଗତ ୨ ମାସ ଧରି କଠିନ ପରିଶ୍ରମ କରି ଏହା ନିର୍ମାଣ କରୁଛନ୍ତି। ସମ୍ପୂର୍ଣ୍ଣ ପ୍ରାକୃତିକ ତଥା ରାସାୟନିକ ପଦାର୍ଥ ମୁକ୍ତ ପଦ୍ଧତିରେ ପରିବେଶ ଅନୁକୂଳ ଭାବରେ ଏହି ମୂର୍ତ୍ତି ଗଠନ କରାଯାଉଛି, ଯାହା ପ୍ରଦୂଷଣ ନିୟନ୍ତ୍ରଣ ଦିଗରେ ଏକ ଉଦାହରଣ ସୃଷ୍ଟି କରିବ।
ଉତ୍ସବର ମୁଖ୍ୟ ଆକର୍ଷଣ ଓ କାର୍ଯ୍ୟକ୍ରମ:
ଭବ୍ୟ ଆଲୋକସଜ୍ଜା: କଲିକତାରୁ ଆସିଥିବା ନୂତନ ଜ୍ଞାନକୌଶଳ ଯୁକ୍ତ ଆଲୋକସଜ୍ଜା ସହିତ ୧୫ ଗୋଟି ଲାଇଟ୍ ଗେଟ୍, ୮୦ ଗୋଟି ଛୋଟ ଗେଟ୍ ଏବଂ ୮୫ ଫୁଟ ଉଚ୍ଚତା ବିଶିଷ୍ଟ ମୁଖ୍ୟ ତୋରଣ ପୂରା ପରିସରକୁ ଝଲସାଇବ।
୧୦ ଦିନବ୍ୟାପୀ ମହାଭୋଗ ଓ ପ୍ରସାଦ ସେବନ: ପ୍ରତ୍ୟେକ ଦିନ ସନ୍ଧ୍ୟାରେ ଶ୍ରଦ୍ଧାଳୁମାନଙ୍କ ପାଇଁ ପ୍ରସାଦ ସେବନର ସୁବ୍ୟବସ୍ଥା କରାଯିବ।
ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ: ପ୍ରତ୍ୟେକ ସନ୍ଧ୍ୟା ୭:୩୦ ମିନିଟରେ ଓଡ଼ିଶାର ସୁନାମଧନ୍ୟ କଣ୍ଠଶିଳ୍ପୀ ଓ ବାଦ୍ୟକାରଙ୍କ ଦ୍ୱାରା ସଙ୍ଗୀତ, ନୃତ୍ୟ ତଥା ଅର୍କେଷ୍ଟ୍ରା ପରିବେଷଣ କରାଯିବ।
ବିଶେଷ ପୂଜାର୍ଚ୍ଚନା: ଗଣେଶ ଚତୁର୍ଥୀ ଦିନ ନୟାପଲ୍ଲୀ ଗ୍ରାମ୍ୟ ପୁଷ୍କରିଣୀରୁ କଳସ ଯାତ୍ରା ଆରମ୍ଭ ହୋଇ ପୂଜା ମଣ୍ଡପରେ ଆବାହନ କରାଯିବ ଏବଂ ୯ ଦିନ ଧରି ସୂର୍ଯ୍ୟ ପୂଜା ଓ ଅନ୍ୟାନ୍ୟ ନୀତିକାନ୍ତି ସମ୍ପନ୍ନ କରାଯାଇ ଶେଷ ଦିନରେ ପୂର୍ଣ୍ଣାହୁତି ଓ ଭସାଣୀ ଉତ୍ସବ ଅନୁଷ୍ଠିତ ହେବ।
ସୁରକ୍ଷା ଓ ବଜେଟ୍ ବ୍ୟବସ୍ଥା:
କମିଶନରେଟ୍ ପୋଲିସ ଓ ସ୍ଥାନୀୟ ପ୍ରଶାସନର ସହଯୋଗ ସହିତ ଶାନ୍ତିଶୃଙ୍ଖଳା ରକ୍ଷା ପାଇଁ ସଂସଦର ୩୦୦ ସ୍ୱେଚ୍ଛାସେବୀ ମୁତୟନ ରହିବେ ଏବଂ ୪୦ଟି ସିସିଟିଭି କ୍ୟାମେରା ଖଞ୍ଜାଯାଇଛି। ଚଳିତ ବର୍ଷ ପୂଜାର ସମୁଦାୟ ବଜେଟ୍ ପ୍ରାୟ ୩୦ ରୁ ୩୫ ଲକ୍ଷ ଟଙ୍କା ଆକଳନ କରାଯାଇଛି।
ପ୍ରେସମିଟ୍ରେ ସଂସଦର ସଭାପତି ହିମାଂଶୁ ପ୍ରଧାନ, ଉପ-ସଭାପତି ସୁବ୍ରତ ପ୍ରଧାନ, ସାଧାରଣ ସମ୍ପାଦକ ସୁରେନ୍ଦ୍ର ନାୟକ, ସାଙ୍ଗଠନିକ ସମ୍ପାଦକ ସଞ୍ଜୀପ କୁମାର ବଳ, କୋଷାଧ୍ୟକ୍ଷ ଦେବାଶିଷ ପ୍ରଧାନ, କାର୍ଯ୍ୟକାରୀ ସଭାପତି ପ୍ରଶାନ୍ତ ବଡ଼ଜେନା ଏବଂ ଗଣମାଧ୍ୟମ ସଂଯୋଜକ ଦେବଦୂତ ମହାନ୍ତି ପ୍ରମୁଖ ଉପସ୍ଥିତ ରହି ସମସ୍ତ ଶ୍ରଦ୍ଧାଳୁଙ୍କୁ ଶାନ୍ତିପୂର୍ଣ୍ଣ ଭାବେ ଏହି ମହୋତ୍ସବରେ ସାମିଲ ହେବାକୁ ନିବେଦନ କରିଛନ୍ତି।
Leave a Reply