ଭୁବନେଶ୍ୱର
ତାରିଖ: 10 ଜୁନ୍, ୨୦୨୬
ରାଜ୍ୟ ଶିକ୍ଷା ବିଭାଗରେ ‘ଏକ ରାଜ୍ୟ, ଏକ ନୀତି’ର ସ୍ଲୋଗାନ କେବଳ କାଗଜପତ୍ରରେ ସୀମିତ ରହିଯାଇଛି କି? ସରକାରଙ୍କ ଗୋଟିଏ ନିୟମକୁ ଅଲଗା ଅଲଗା ଜିଲ୍ଲା ନିଜ ଇଚ୍ଛା ମୁତାବକ ଭିନ୍ନ ଭିନ୍ନ ଭାବେ ବ୍ୟାଖ୍ୟା କରିବା ଫଳରେ ଏବେ ହଜାର ହଜାର ମାଧ୍ୟମିକ ଟିଜିଟି (TGT) ଶିକ୍ଷକଙ୍କ ଭବିଷ୍ୟତ ଅନ୍ଧାରକୁ ଠେଲି ହୋଇଯାଇଛି। ଆନ୍ତଃଜିଲ୍ଲା ମ୍ୟୁଚୁଆଲ ଟ୍ରାନ୍ସଫର (Mutual Transfer) ପ୍ରକ୍ରିୟାରେ ଦେଖାଦେଇଥିବା ଚରମ ଅସମାନତା ଓ ପ୍ରଶାସନିକ ମନମୁଖୀ କାର୍ଯ୍ୟକଳାପ ବିରୋଧରେ ଏବେ ଶିକ୍ଷକ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଏହି ସମସ୍ୟାର ସମାଧାନ ପାଇଁ ଏନପିଏସ (NPS) ଶିକ୍ଷକ ସଂଘ ମାନ୍ୟବର ମୁଖ୍ୟମନ୍ତ୍ରୀ ଓ ଗଣଶିକ୍ଷା ମନ୍ତ୍ରୀଙ୍କ ତୁରନ୍ତ ସିଧାସଳଖ ହସ୍ତକ୍ଷେପ ଲୋଡ଼ିଛି।
ସଂଘର ଅଭିଯୋଗ ଅନୁସାରେ, ଦ୍ୱିତୀୟ ଥର ଆନ୍ତଃଜିଲ୍ଲା ମ୍ୟୁଚୁଆଲ ଟ୍ରାନ୍ସଫର ପାଇଁ କରାଯାଇଥିବା ଏକା ପ୍ରକାରର ଆବେଦନକୁ କେତେକ ଜିଲ୍ଲା ସହର୍ଷ ଗ୍ରହଣ କରିଥିବା ବେଳେ, ପଡ଼ୋଶୀ ଜିଲ୍ଲାଗୁଡ଼ିକ ତାହାକୁ ସିଧାସଳଖ ଖାରଜ କରିଦେଇଛନ୍ତି।
ଅନୁମୋଦନ ମିଳିଥିବା ଜିଲ୍ଲା: ଭଦ୍ରକ, ଖୋର୍ଦ୍ଧା, ଜଗତସିଂହପୁର, ପୁରୀ ଓ ମୟୂରଭଞ୍ଜ।
ଆବେଦନ ନାକଚ ହୋଇଥିବା ଜିଲ୍ଲା: କଟକ, କେନ୍ଦ୍ରାପଡ଼ା ଓ ଯାଜପୁର।
“ଯଦି ସାରା ରାଜ୍ୟ ପାଇଁ ବଦଳି ନୀତି ଗୋଟିଏ, ତେବେ ଜିଲ୍ଲା ଶିକ୍ଷା ଅଧିକାରୀ (DEO) ମାନଙ୍କ ମାନଦଣ୍ଡ ଅଲଗା କେମିତି ହେଲା?” ବୋଲି ପ୍ରଶ୍ନ ଉଠାଇଛନ୍ତି ଏନପିଏସ ଶିକ୍ଷକ ସଂଘର ସଭାପତି ଶ୍ରୀ ପ୍ରଦୀପ୍ତ କୁମାର ପ୍ରଧାନ। ସେ କହିଛନ୍ତି ଯେ, ଏହି ପ୍ରଶାସନିକ ଦ୍ୱନ୍ଦ୍ୱ କେବଳ ଶିକ୍ଷକମାନଙ୍କ ମଧ୍ୟରେ ଭେଦଭାବ ସୃଷ୍ଟି କରୁନାହିଁ, ବରଂ ସରକାରଙ୍କ ସ୍ୱଚ୍ଛତା ଉପରେ ମଧ୍ୟ ବଡ଼ ପ୍ରଶ୍ନବାଚୀ ସୃଷ୍ଟି କରୁଛି।
ଶିକ୍ଷକ ସଂଘର ମୁଖ୍ୟ ଦାବିଗୁଡ଼ିକ:
ସମାନ ବ୍ୟାଖ୍ୟା ଓ ଗାଇଡଲାଇନ: ସାରା ରାଜ୍ୟର ସମସ୍ତ ଜିଲ୍ଲା ପାଇଁ ବଦଳି ନିୟମର ଏକ ସମାନ ଏବଂ ସ୍ପଷ୍ଟ ସରକାରୀ ନିର୍ଦ୍ଦେଶନାମା ଜାରି କରାଯାଉ।
କଟକ, କେନ୍ଦ୍ରାପଡ଼ା ଓ ଯାଜପୁର ଭଳି ଜିଲ୍ଲାରେ ଖାରଜ ହୋଇଥିବା ଯୋଗ୍ୟ ଆବେଦନଗୁଡ଼ିକୁ ତୁରନ୍ତ ପୁନର୍ବିଚାର କରାଯାଇ ମଞ୍ଜୁରୀ ଦିଆଯାଉ।
ଜିଲ୍ଲାସ୍ତରୀୟ ଅଧିକାରୀମାନଙ୍କ ମନମୁଖୀ କାର୍ଯ୍ୟର ଉଚ୍ଚସ୍ତରୀୟ ତଦାରଖ କରାଯାଉ।
ମାନସିକ ଚାପରେ ଶିକ୍ଷାଦାନ ବ୍ୟାହତ ହେବା ଆଶଙ୍କା
ଏହି ପ୍ରସଙ୍ଗରେ ଶିକ୍ଷକ ସଂଘ ଏକ ନୂଆ ଦିଗ ପ୍ରତି ସରକାରଙ୍କ ଦୃଷ୍ଟି ଆକର୍ଷଣ କରିଛି। ନିଜ ଘରଠାରୁ ଶହ ଶହ କିଲୋମିଟର ଦୂରରେ ରହି ଶିକ୍ଷାଦାନ କରୁଥିବା ଶିକ୍ଷକମାନେ ଏଭଳି ପାତରଅନ୍ତର ନୀତି ଯୋଗୁଁ ଘୋର ମାନସିକ ଚାପର ସମ୍ମୁଖୀନ ହେଉଛନ୍ତି। ଜଣେ ଶିକ୍ଷକ ମାନସିକ ସ୍ତରରେ ବିଚଳିତ ରହିଲେ ତାହାର ସିଧାସଳଖ ପ୍ରଭାବ ସ୍କୁଲର ଛାତ୍ରଛାତ୍ରୀ ଓ ଶିକ୍ଷାଦାନ ଉପରେ ପଡ଼ିବ। ତେଣୁ ସରକାର ଏହାକୁ କେବଳ ଏକ “ପ୍ରଶାସନିକ ପ୍ରକ୍ରିୟା” ନଭାବି ସାମାଜିକ ଓ ମାନବିକ ଦୃଷ୍ଟିକୋଣରୁ ବିଚାର କରିବା ଆବଶ୍ୟକ।
ସଂଘ ପକ୍ଷରୁ ଚେତାବନୀ ଦିଆଯାଇଛି ଯେ, ଯଦି ସରକାର ତୁରନ୍ତ ଏହି ଅସମାନତା ଦୂର ନକରନ୍ତି, ତେବେ ଆଗାମୀ ଦିନରେ ବଞ୍ଚିତ ଶିକ୍ଷକମାନେ ରାଜପଥକୁ ଓହ୍ଲାଇବେ ବୋଲି କହିଛନ୍ତି
Leave a Reply